Кентауда 200 орындық зияткерлік бастауыш мектебі ашылды
Кентау қаласында бүгін «Дин-Асыл» бастауыш зияткерлік білім ошағы ашылды. Мектептің сыйымдылығы 200 оқушыны қамтиды. Бүгінгі таңда 150-ге жуық бала қабылданып үлгерген. Оқу орны жекеменшік болғанымен балаларға тегін білім берілмек. Үш мезгіл тамақ та қарастырылған.
Жаңа бастауыш оқу орнының ашылу салтанатына қатысқан қала әкімінің орынбасары Ақнұр Байболова ата-аналар мен оқушыларды, ұстаздарды жаңа оқу жылымен құттықтап, сәттілік тіледі.
Жалпы мектепте 10 бастауыш сыныбы ашылған. Сабақ уақыты таңғы 8:00 бен кешкі 17:00 аралығында. Мектепте дзюдо, футбол, би,ән, домбыра, робототехника және гимнастика үйірмелері бар. Түстен кейінгі уақытта оқушылар үй тапсырмаларын орындап, үйірмелерге қатысады.
